مصطفى جانلى
بر حدیث:
عَنْ أَبِي هُرَيْرَةَ رضي الله عنه، قَالَ قَالَ رَسُولُ اللّٰهِ صَلَّى اللّٰهُ عَلَيْهِ وَ سَلَّم:
« أَتَاكُمْ رَمَضَانُ شَهْرٌ مُبَارَكٌ فَرَضَ اللّٰهُ عَزَّ وَجَلَّ عَلَيْكُمْ صِيَامَهُ تُفْتَحُ فِيهِ أَبْوَابُ السَّمَاءِ وَتُغْلَقُ فِيهِ أَبْوَابُ الْجَحيمِ وَتُغَلُّ فِيهِ مَرَدَةُ الشَّيَاطِينِ »
ابو هریرە رضی الله عنه دن روایت ایدیلدیگنە گورە، رسول الله صلى الله علیه و سلم افندیمز شویلە بویورمشدر:
''مبارك رمضان آیی سزە گلدی. یوجە الله بو آیدە سزە اوروج طوتمەیی فرض قیلدی. بو آیدە سما (جنت) قاپولری آچیلیر، جهنم قاپولری ایسە قاپانیر و شیطانلرڭ آزغینلری باغلانیر. '' (نسائی، صیام، ٥)
بر مساژ: ''رمضان آیی مبارك بر آیدر؛ آرینمق ایچون، جناب حقە یاقینلق ایچون بر فرصتدر. أویلەیسە بو فرصتی دگرلندیر! ''
بر باشقە گوزلدر، شمدی سیمالر،
بر باشقە آچیلیر، یوجە سمالر،
بر باشقە یوكسلیر، حمد و ثنالر؛
خوش گلدیڭ... ای اون بر آیڭ سلطانی!
یوركلر بر باشقە حسلنیر شمدی،
بدن دگل، روحلر بسلنیر شمدی،
اذانلر بر باشقە، سسلنیر شمدی؛
خوش گلدیڭ... ای اون بر آیڭ سلطانی!
بر باشقە اوزانیر، یوقسولە اللر،
شفقتە رام اولور، اڭ قاتی دیللر،
یاش دگل مژدەدر، گوزدەكی سللر؛
خوش گلدیڭ... ای اون بر آیڭ سلطانی!
اوروجلرڭ اجری، حقدن بیچیلیر،
قدیر گیجەسندە، گوكلر گچیلیر،
او گیجە جنتدە، مكان سچیلیر؛
خوش گلدیڭ... ای اون بر آیڭ سلطانی!
(جنگیز نعمان اوغلی)
اون بر آیڭ سلطانی رمضان، بتون بر سننڭ اڭ بركتلی زمان دیلیمیدر. رمضان آیی، مبارك بر آیدر. زیرا سرلوحه حدیثمزدە سوگیلی پیغمبریمز صلى الله علیه و سلم؛
''مبارك رمضان آیی سزە گلدی.'' بویورارق رمضان آینڭ مبارك بر آی اولدیغنی بزلرە بیلدیرمشدر. مبارك كلمەسی لغتدە؛ بركتلی، فیضلی، خیرلی و مقدس گبی معنالرە گلمكدەدر. بو معنادە رمضان آیی؛ بركتلی، فیضلی و خیرلی بر آیدر. بو مبارك آیڭ تشریف ایتمەسیلە برلكدە؛ گوڭللر شنلنیر، فقیرلر اوموتلانیر، زنگینلر خیرە فرصت بولور. قیصەجەسی رمضان، حیاتمزە بركت گتیرر. حقیقةً سحوریلە، امساكیلە؛ افطاری، فطر صدقەسیلە؛ مقابلەسی، اعتكافی و تراویح نمازیلە رمضان صانكە معنوی بر شنلكدر...
بو باقیمدن مؤمنلر اولارق؛ رمضان آینڭ عظمتینڭ فرقندە اولملی، بونی فرصت بیلملی، معنوی فیض و بركتندن طویاسییە استفادە ایتمەیە چالیشملییز. بو مبارك آیی اڭ ایی شكلدە دگرلندیرمك ایچون المزدن گلن غیرتی گوسترملییز.
الله تعالی حضرتلری، بقرە سورەسینڭ ۱٨٥نجى آیت كریمەسندە شویلە بویورمقدەدر:
'' او (صاییلی گونلر)؛ طوغرییی اگریدن آییرمە، گیدیلەجك یولی بولمە قونوسندە آچیقلامەلر و انسانلرە رهبر اولارق قرآنڭ ایندیریلدیگی رمضان آییدر. ''
اوت؛ رمضان آیی، قرآن آییدر، قرآن ایندیریلدیگی آیدر. او قرآن كە، انسانلر ایچون بر هدایت رهبریدر. قرآن، صراط مستقیم أوزرە ایلرلەیەبیلمەلری ایچون انسانلرە یول گوسترر. قرآن، گوڭللردە اولان خستەلقلر ایچون شفادر. قرآن، محشر گونی صاحبنە شفاعتجیدر. حقیقتدە رمضان آیی، شرفینی اڭ باشدە قرآندن آلیر. أویلەیسە بو رمضان، هایدی قرآنه قوشالم! هایدی قرآنله جوشالم، قرآنله گوڭللریمزی جوشدیرالم.
رمضان آیی، اوروج آییدر. سوگیلی پیغمبریمز صلى الله علیه و سلم؛ سنەنڭ اون ایكی آیی ایچریسندە، سادەجە رمضان آیندە بتون بر آیی اوروجلە گچیرمشدر. رمضان آیندە طوتولان بر گون اوروج، دیگر گونلردە طوتولان اوروجلردن داها فضیلتلیدر و ثوابی داها چوقدر.
''اوروج بر قالقاندر...'' (بخاری، صوم، ۲) بویورویور ایكی جهانڭ افندیسی. آما؛
«– ناصل بر اوروج مؤمن ایچون قالقان اولویور؟» بونڭ أوزرندە تفكر ایتمك ایجاب ایدر. شونی ایی بیلەلم كە؛ المزی، دیلمزی، گوزیمزی هر تورلی كوتولكدن اوزاقلاشدیرارق طوتدیغمز بر اوروج، بزم ایچون قالقان اولاجقدر.
بر آیت كریمەدە شویلە بویورولویور:
''اوروج، سزدن اول گچمش امتلرە فرض قیلیندیغی گبی سزە دە فرض قیلیندی. اومولور كە بو سایەدە تقوایە ایررسڭز.'' (البقرە، ۲ / ۱٨۳)
دیمك كە رمضان وسیلەسیلە تقوایە ارشیلییور. اونڭ ایچون رمضان آیی تقوا آییدر. مؤمنلرە تقوالرینی زیادەلشدیرمك ایچون بر فرصتدر رمضان. اوروج، قرآن تلاوتی، سحور گبی لطفلرە نائل اولان مؤمن؛ رمضان آیی بوینجە معنوی اولارق غدالانیر. بو معنادە رمضان آیی، مؤمن ایچون معنوی بر غدادر.
بو باقیمدن رمضان، مؤمنین نشئە و سوینچ قایناغیدر. زیرا رمضاندە سحور واردر. سحور، سحر كلمەسیلە عین كوكدن گلیر. مؤمن، گونڭ اڭ قیمتلی وقتی اولان سحرلە باشلار اوروجنە. بر باشقە دییشلە سفر، سحرلە باشلار:
شیطان صاغندن و صولندن، أوڭندن و آرقەسندن هجوم ایدر، نفس دە اوڭا یاردیمجی قوت اولور. بو بر نوع نفسلە، شیطانلە بر صاواشدر. مؤمن بتون بو صالوولرە قارشی، امساك زرهنە بورونور. اوروج قالقاننی قوشانیر. ذكرلە، نمازلە، قرآنله كندینی محافظە ایدر.
بو معنادە رمضان، بر نفس تزكیەسیدر. اوروج وسیلەسی ایلە نفسلە مجادلە ایدیلیر. سوگیلی پیغمبریمز اوروج ایچون « صبرڭ یاریسی » بویورارق بو زورلی مجادلەیە اشارت بویورمشدر. (ترمذی، دعا، ٨٦) ایشتە رمضان، نفس محاسبەسی و نفس تربیەسی ایچون بر فرصتدر.
رمضان آیی؛ رحمت، مغفرت و اڭ نهایتندە جهنمدن آزاد اولمە آییدر. یوجە الله بو مبارك آیدە؛ رحمتینی، مغفرتینی بولجە لطف ایدر.
زكات، صدقە، فطر... رمضان آیی انفاق آییدر. رمضان آیی گلدیگندە مؤمنلرڭ انفاق دویغولری قباریر. ینە رمضان آیی، اكرام آییدر. مؤمنلر رمضان آیی گلدیگندە اكراملر یاپار، مؤمن قرداشلرینە افطارلر ویرر...
چوجقلر ایچون دە نشئە قایناغیدر رمضان. سحور، افطار، تراویح جوشقوسنی اونلر دە حس ایدرلر طویە طویە...
رمضان؛ عبادتە یوغونلاشمە زمانی، یوڭمزی ربمزە چویرمە زمانیدر. رمضان، ربمزلە قربیت تأسیس ایدەبیلمەمز ایچون بر بویوك فرصتدر بزم ایچون.
مبارك رمضان آینڭ گلمەسیلە برلكدە جامع و مسجدلردە، أولردە جوشقولی بر شكلدە قرآنلر، مقابلەلر اوقونور. مقابلە، سوگیلی پیغمبر افندیمزدن بزە تودیع ایدیلن گوزل بر میراثدر. رمضان آیندە فخر كائنات افندیمزلە جبریل علیه السلام قارشیلقلی اولارق قرآن كریمی اوقورلردی. حتی رسول اكرم افندیمزڭ وفاتندن أوڭجەكی صوڭ رمضاندە مقابلە ایكی دفعە گرچكلشمشدر. (بخاری، بدء الوحی، ٥)
رمضان آیندە نمازلریمزە نماز، ذكرلریمزە ذكر قاتارز. رمضان گیجەلریندە ذاتًا سحورە قالقدیغمز ایچون تهجد نمازی قیلمقدە داها آرزولییزدر. او تهجد نمازی كە، گونڭ اڭ فیضلی و بركتلی وقتندە قیلنان اڭ فضیلتلی نافلە نمازدر. ایشتە رمضان گیجەلری بو فرصتی ویرر بزلرە...
آیریجە رمضان، ایچندە بیڭ آیدن داها خیرلی اولان قدر گیجەسنی سینەسندە باریندیران بر آیدر.
بتون بو گوزللكلریلە رمضان؛ صانكە معنوی بر شنلك، معنوی بر قامپ گبیدر.
رمضان آینڭ صوڭندە بو مبارك گونلری حقیلە دگرلندیرەبیلن مؤمنی بكلەین ایكی بایرام واردر:
• بری رمضانڭ صوڭندەكی بایرام،
• أوتەكیسی دە جهنمدن آزاد اولمە بایرامیدر.
اونڭ ایچون رمضان، حالمزی اصلاح ایچون بر فرصتدر. بیراقالم كوتو سوزلری، كوتو طاورانیشلری. ربمزە یوڭلەلم! سحوریلە، افطاریلە، نمازیلە، قرآن تلاوتیلە، ذكر و دعاسیلە گلین بو رمضانی طویاسییە یاشایالم أوزریمزدەكی غفلت أورتوسنی قالدیرالم، مؤمن فراستیلە حركت ایدوب رمضان آیينی دگرلندیرمەیە چالیشالم ان شاء الله.
محتملاً بو ییل دە جوشقولی بر رمضان گچیرەمەیەجگز. معنویاتمزی جوشدیران تراویحلر، قالابالق افطارلر وسائره اولمایاجق. ذاتًا پاندەمی سورجندە أولرە قاپانمش طورومدەیز. گلین أولریمزی اعتكاف آلانلرینە دونوشدیرەلم. بو رمضان آیينی صانكە صوڭ رمضانمز گبی عد ایدەلم. بو مبارك آیی؛ حقە یوڭلمك ایچون، نفسمزی آریندیرمق ایچون بر فرصت بیلەلم.
أویلەیسە هایدی مؤمنلر! هپ برابر رمضان آیينی عشقلە، شوقلە گچیرمەیە چالیشالم. صیجاق بر هوادە صوغوق صو ایچركن آلدیغمز ذوق گبی یودوم یودوم یاشایالم رمضانی! بو رمضان آیينی، صانكە صوڭ رمضانمز گبی؛ نفسمزی آریندیرمق و باغیشلانمق ایچون صوڭ فرصت گبی گورەلم. دقت! بو رمضان بلكە صوڭ رمضانمز اولابیلیر. الله بیلیر بر داها بلكە رمضان گورەمەیەجگز. بر داها بلكە بو فرصتی بولامایاجغز. شونی اونوتمایالم كە، گچن رمضان آرامزدە اولان نیجە سودیگمز كیشیلر، بو رمضانە قاووشامادن رحمت رحمانە قاووشدیلر.
بو رمضان صانكە معنوی بر قامپە گیرییورمش گبی حس ایدەلم كندیمزی... سحریلە، سحوریلە، امساك و افطاریلە؛ مقابلە و تراویحی ایلە معنوی بر شنلك گبی دگرلندیرەلم بو مبارك گونلری. یالان سویلەمەدن، غیبت ایتمەدن، مؤمن قرداشمزڭ گوڭلنی قیرمدن، ذكرلرلە، قرآن تلاوتلریلە، انفاقلرلە بر رمضان گچیرەلم ان شاء الله.
سوگیلی پیغمبریمزڭ دیلیلە ایشتە؛
«ینە (بتون مغفرت امكانلریلە) رمضان گلدی. او آیدە جنتڭ قاپولری آچیلیر، جهنم قاپولری قاپانیر. شیطانلر زنجیرە وورولور. بویلە بر آیە ارشوب دە باغیشلانمامش اولانە یازیق! رمضاندە دە باغیشلانمازسە انسان، پكی باشقە نە زمان؟» (ابن ابی شیبە، مصنف، ٢ / ۲٧۰)
ربمز، جملەمزی رمضان آینڭ قیمتینی بیلنلردن أیلەسین!
ربمز؛ بو دنیادە افطارلە، بایراملە شنلندیردیگی گبی؛ آخرتدە دە جنتیلە، جمالیلە بزلری شنلندیرسین و جهنمدن آزاد اولانلردن أیلەسین ان شاء الله. آمین...
Hiç yorum yok:
Yorum Gönder